વિશ્વમાં ઘણી દુર્લભ પ્રજાતિઓના જીવ જોવા મળે છે. આમાંના મોટાભાગના જીવો સમુદ્રમાં જોવા મળે છે. થોડા દિવસો પહેલા જ વૈજ્ઞાનિકોએ સમુદ્રમાં આવી અનોખી માછલી શોધી કાઢી છે, જેની આંખો તેના માથા પર છે. માછલીની આ આંખો લીલા બલ્બ જેવી દેખાય છે. આવી માછલી અગાઉ ક્યારેય જોવામાં નહોતી આવી. વૈજ્ઞાનિકોએ આ માછલીને કેલિફોર્નિયાના મોન્ટેરી ખાડીના ઊંડાણમાં શોધી કાઢવામાં આવી છે.
સૌથી નવાઈ પમાડે એવી વાત એ છે કે માછલીની આંખો માથામાંથી બહાર ડોકિયું કરતી જોવા મળે છે, જેનું નામ છે બેરેલઆઈ ફિશ. બેરેલઆઈ ફિશ માછલીની ખૂબ જ દુર્લભ પ્રજાતિ છે, કારણ કે તે ભાગ્યે જ જોવા મળે છે. આ માછલીનું વૈજ્ઞાનિક નામ Macropinna microstoma છે, જેને અત્યાર સુધી માત્ર 9 વખત જોવામાં આવી છે. મોન્ટેરે બે એક્વેરિયમ રિસર્ચ ઈન્સ્ટિટ્યૂટ (એમબીએઆરઆઈ)ના વૈજ્ઞાનિકોએ આ માછલીને જોઈ છે. વૈજ્ઞાનિકોએ તેને છેલ્લે 9 ડિસેમ્બર 2021ના રોજ સમુદ્રમાં જોઇ હતી
જ્યારે MBARIનું રિમોટલી ઓપરેટેડ વ્હીકલ (ROV) મોન્ટેરેની ખાડીમાં નીચે ગયું ત્યારે વૈજ્ઞાનિકોએ કંઈક એવું જોયું જે જોઈને તેઓ આશ્ચર્યચકિત થઈ ગયા. તેણે જે માછલી જોઈ તે ખૂબ જ દુર્લભ પ્રજાતિની હતી. આ માછલી લગભગ 2132 ફૂટ નીચે પાણીમાં જોવા મળી હતી. આ માછલી પેસિફિક મહાસાગરની સૌથી ઊંડી સબમરીન કેન્યનમાં દેખાઈ હતી.
MBARIના વરિષ્ઠ વૈજ્ઞાનિક થોમસ નોલ્સે જણાવ્યું કે જ્યારે તેમણે આ બેરેલઆઈ માછલી જોઈ ત્યારે તે કદમાં ઘણી નાની દેખાતી હતી, પરંતુ થોડા સમય પછી મને ખબર પડી કે તે વિશ્વના દુર્લભ જીવોમાંની એક છે. એવું કહેવાય છે કે સમુદ્રી જીવોનો અભ્યાસ કરતા વૈજ્ઞાનિકો આ માછલીને જીવનમાં માત્ર એક જ વાર જુએ છે.
MBARI ના ROV એ પાણીમાં ડૂબકી મારતી વખતે આ માછલી જોઈ. આ માછલીની આંખો પર પ્રવાહી પદાર્થનું કવર હોય છે જે તેની રક્ષા કરે છે. આ દુર્લભ પ્રજાતિની માછલીઓની આંખો સંવેદનશીલ હોય છે, જે પ્રકાશને જોઈને પરેશાન થઈ જાય છે અને દોડવા લાગે છે. તેમની આંખોની સામે, આગળની બાજુએ બે નાના નાના કેપ્સ્યુલ્સ છે જે સૂંઘવાનું કામ કરે છે.
જાપાનના બેરિંગ સાગરથી લઈને બાજા કેલિફોર્નિયા સુધી સમુદ્રની ઊંડાઈમાં બેરલઆઈ ફિશ જોવા મળે છે. આ માછલી 650 ફૂટથી 3300 ફૂટ સુધીની ઊંડાઈમાં ડૂબકી મારે છે અને 2000થી 2600 ફૂટની ઊંડાઈમાં રહે છે. અહીં પાણી ઘેરા રંગનું થઈ જાય છે જેના કારણે અંધારું છવાયેલું રહે છે
વૈજ્ઞાનિકોનું કહેવું છે કે બેરેલઆઈ ફિશની સંખ્યા કેટલી છે એ વિશે કોઈ માહિતી નથી. તેના બદલે લેન્ટર્નફિશ, બ્રિસ્ટલમાઉથ જેવી માછલીઓ જોવી ખૂબ જ સરળ હોય છે. વૈજ્ઞાનિકોને એ પણ ખબર નથી કે તેમની આંખો પર પ્રવાહીનું આવરણ શું છે.