એશિયાના બીજા અને વિશ્વના 10મા સૌથી અમીર વ્યક્તિ મુકેશ અંબાણી કોઈ પરિચયની જરૂર નથી. દેશની સૌથી મૂલ્યવાન કંપની રિલાયન્સ ઈન્ડસ્ટ્રીઝના ચેરમેનની ઊંચાઈએ પહોંચવાની સ્ટોરી તો તમે ઘણી વખત સાંભળી હશે, પરંતુ અંબાણી સાથે જોડાયેલી કેટલીક ખાસ વાતો છે જે કદાચ તમે નહીં જાણતા હોવ. આજે અમે મુકેશ અંબાણી સાથે જોડાયેલી કેટલીક ખાસ વાતો જણાવી રહ્યા છીએ. ભવિષ્યમાં એમની યોજના ગ્રીન એનર્જીના ક્ષેત્રમાં મોટાપાયે રોકાણ કરવાની છે.
ભારતના બીજા સૌથી અમીર મુકેશ અંબાણીનો જન્મ 19 એપ્રિલ 1957ના રોજ થયો હતો. તમને જણાવી દઈએ કે મુકેશનો જન્મ ભારતમાં નહી પરંતુ દેશની બહાર થયો હતો. સ્વર્ગસ્થ ધીરુભાઈ અંબાણી અને કોકિલાબેન અંબાણીના પુત્ર મુકેશ યમનમાં જન્મ્યા હતા. ધીરુભાઈ તે સમયે યમનમાં વેપાર કરતા હતા.
તમને જણાવી દઈએ કે મુકેશ અંબાણી કોલેજ ડ્રોપઆઉટ છે. 1980ના દાયકામાં, મુકેશ અંબાણી કેલિફોર્નિયાની સ્ટેનફોર્ડ યુનિવર્સિટીમાં MBAનો અભ્યાસ કરતા હતા, પરંતુ ભારતમાં તેમના પિતાનો બિઝનેસ સંભાળવા માટે એમને ભારત પરત ફરવું પડ્યું અને એમબીએનો અભ્યાસ અધવચ્ચે જ છોડી દેવો પડ્યો હતો. મુકેશ અંબાણીએ તેમના પિતા ધીરુભાઈ અંબાણીની સાથે મળીને 1981માં રિલાયન્સ પેટ્રોલિયમ કેમિકલ્સની શરૂઆત કરી હતી.
લાંબા સમય સુધી એશિયાના સૌથી અમીર વ્યક્તિ રહેલા મુકેશ અંબાણી વિશે બીજી એક રસપ્રદ વાત એ છે કે તેઓ સંપૂર્ણ શાકાહારી છે. એક રિપોર્ટ અનુસાર, રિલાયન્સ ઈન્ડસ્ટ્રીઝના ચેરમેનને ઈડલી ખાવાનું પસંદ છે. તે પોતાના રોજિંદા આહારમાં દાળ, ભાત અને રોટલી ખાવાનું પસંદ કરે છે.
ભલે મુકેશ અંબાણી આઇપીએલમાં રમનારી ક્રિકેટ ટીમના માલિક છે, પરંતુ જ્યારે રમતની વાત આવે છે ત્યારે તેમની પ્રથમ પસંદગી ક્રિકેટ નહીં પણ હોકી રહી છે. પોતાના શાળાના દિવસોમાં મુકેશને હોકીની રમત પ્રત્યે ઊંડો પ્રેમ હતો. આ લગાવ એટલો બધો હતો કે તેની અસર તેના અભ્યાસ પર પણ પડી હતી.
મુકેશ અંબાણી એમના નેચર અને ડ્રેસિંગ સેન્સના મામલે ખૂબ જ સિમ્પલ છે. તે હંમેશા સાધારણ સફેદ શર્ટ અને બ્લેક પેન્ટ પહેરવાનું પસંદ કરે છે. એક રિપોર્ટ અનુસાર, તે ક્યારેય કોઈ બ્રાન્ડને ફોલો કરતો નથી. આ સિવાય તે ફિલ્મોનો પણ શોખીન છે અને અઠવાડિયામાં ત્રણ જેટલી ફિલ્મો જુએ છે.
મુકેશ અંબાણીના ઘર એન્ટિલિયા વિશ્વની સૌથી મોંઘી આવાસીય સંપત્તિમાં ટોચ પર છે. તે દક્ષિણ મુંબઈમાં 4 લાખ સ્કવેર ફૂટમાં બનેલ છે. કિંમતની વાત કરીએ તો તે લગભગ 11 હજાર કરોડ રૂપિયાનું છે. આ મકાનમાં 27 ફ્લોર છે અને તેમાં 600 થી વધુ કર્મચારીઓ કામ કરે છે. ખાસ વાત એ છે કે ઘરના દરેક રૂમમાં તેના પિતા અને પરિવારની તસવીર લાગેલી છે.